Um GFF
Á döfinni
Styrktaraðilar
Landnám Ingólfs
Land-Nám
Gagnabanki
|
LAND-NÁM; Samstarf með framhaldsskólum
Uppgræðsla og skólastarf hefur jafnan átt samleið. Landgræðsla ríkisins hefur af og til kallað til skólanemendur til uppgræðslustarfa og skógræktafélögin sömuleiðis. GFF fór nokkrum sinnum á upphafsárunum með nemendum og kennurum Borgarholtsskóla í Úlfarsfell til að gróðursetja trjáplöntur. Síðustu tvö ár hefur verið gengið skrefinu lengra og samstarfi við framhaldsskóla fundin ákveðin staðfesta. Tveir framhaldsskólar, Flensborgarskólinn í Hafnarfirði og Borgarholtsskólinn í Reykjavík hafa gengið til samstarfs við GFF undir aðferðum LAND-NÁMS.
Samstarfið við framhaldsskólana snýst í báðum tilfellum um trjáplöntun og vöktun nemenda með því hvort og hvernig plönturnar vaxa og dafna. Í báðum tilfellum hafa viðkomandi sveitarfélög falið GFF og skólunum umsjón með ákveðnu landsvæði í því skyni að þar verði vettvangur samstarfs þeirra undir aðferðum LAND-NÁMS. Stefna GFF er sú að græða upp þar sem þörfin er mest. Í samræmi við það sækjast samtökin eftir að græða upp og koma til trjágróðri á landi sem er gróðursnautt. Sú er raunin í báðum tilvikum. Hafnarfjarðarbær fól GFF og Flensborgarskólanum umsjón með um 2 ha svæði í Krýsuvík, brekku sunnan vegarins sem liggur heim að skólahúsinu þar sem nú er rekin meðferðarstöð á vegum Krýsuvíkursamtakanna. Mosfellsbær fól GFF og Borgarholtsskólanum umsjón með landi innarlega í Þormóðsdal. Bæði þessi svæði eru að mestu uppblásinn melur.
Það eru nemendur í Lífsleikni á fyrsta ári sem taka LAND-NÁM sem hluta af námskeiðinu. Nemendur fá fyrirlestra og verklegan undirbúning af hálfu GFF áður en farið er út í mörkina til að planta trjám. Hugmyndin er sú að skólarnir hafi sitt svæði og tengi nafn sitt við það og það skógarrjóður sem þar vex smám saman. Skógarreiturinn verði einnig uppspretta upplýsinga sem nemendur skólanna afla og vinna með. Nemendur seinni ára munu bæta við trjáplöntum í skógarreitinn sem og upplýsingum í gagnagrunninn. Hugmyndin er því sú að gagnagrunnurinn verði tæki fyrir viðkomandi skóla tæki til að nota við t.d. kennslu í upplýsingatækni, tölfræði og líffræði.
Talsverður breytileiki er í tegundum, hvaða áburðarefni eru notuð sem og hvaða útplöntunaraðferð. Nemendur gefst því kostur á að skoða hvort markverður munur sé á vexti plantna við þessa mismunandi þætti. Auk þess að vera þjálfun fyrir nemendur að vinna með upplýsingaöflun og vinnslu þeirra vonast GFF til þess að af þessu starfi fáist raunveruleg þekking sem gagnast muni öllu uppgræðslu og skógræktarstarfi í Landnámi Ingólfs og þó víðar væri farið.
|
|